د روزګان والي د لیکوالانو او سیمیزو رسنیو له استازو سره وکتل
شنبه (۶ د رمضان المبارک ۱۴۴۵) د روزګان والي الحاج مولوي عنایت الله شجاع په خپل کاري دفتر کې د اطلاعاتو او کلتور د رئیس قاري آغاولي قریشي په مشرۍ د روزګان ولایت له لیکوالانو او د خصوصي او دولتي رسنیو له استازو سره وکتل.
ښاغلي شجاع په ټولنه کې لیکوالان او رسنۍ مهمې وبللې او غوښتنه يې وکړه، چې باید رسنۍ او لیکوالان لا زیاته هڅه وکړي او خپل مسؤلیت دې په شکل ادا کړي.
نوموړي زياته کړه، افغانانو تاریخونه جوړ کړي دي خو لیکل شوي نه دي، ښه مثال یې په لنډ وخت کې د څو امپراطوریو ماتول او د اسلامي امارت له لوري هغه کسانو ته تاریخي عفوه ده، چې شل کاله په هېواد کې د امارت سره په جګړه بوخت و، چې په تاریخ کې باید په زرينو کرښو ولیکل شي.
د اطلاعاتو او کلتور رئیس قاري آغاولي قریشي هم د لیکوالانو او رسنیو پر ارزښت خبرې وکړې.
د رسنیو استازو او لیکوالانو هم په خپل نوبت خبرې وکړې او د دولتي ادارو له مسؤلينو څخه يې خوښي څرګنده کړه، چې د معلوماتو د شريکولو په برخه کې له دوی سره همکاري کوي.
