د( تاریخي آبداتو او سیاحتي جاذبو حالت او اهمیت) تر سرلیک لاندې سیمینار جوړ شو

د ننګرهار اطلاعاتو او کلتور ریاست له لوري د (تاریخي آبداتو او سیاحتي جاذبو حالت او اهمیت) تر سرلیک لاندې یو ورځنی سیمینار جوړ شو، چې پکې د اطلاعاتو او کلتور وزارت د کلتوري چارو معین مولوي عتیق الله عزیزي په ګډون ګڼ شمېر حکومتي او ملکي مسؤلینو، د بېلابېلو پوهنتونونو استادانو، محصلینو، علماوو، قومي مشرانو، د کوچیانو استازیو، ځوانانو او ژورنالیستانو ګډون کوی و.
د سیمینار د پیل وینا د دغه ولایت د اطلاعاتو او کلتور رئیس مولوي نور محمد حنیف وکړه او ویې ویل: د شل کلن اشغال پرمهال زموږ هېواد له ګڼو نورو زیانونو ترڅنګ تاریخي ځایونو، آبداتو او سیاحتي ځایونو هم زیانونه لیدلي، چې له نېکه مرغه د اوسني نظام له بري وروسته دغې برخې ته ډېره پاملرنه شوې.
ورپسې د اطلاعاتو او کلتور وزارت کلتوري معین په خپلو خبرو کې وویل: تاریخي ځایونه او آبدات د ټول ملت ګډ میراث دی، حکومت او خلک یې په ساتنه کې یوشان مسؤلیت لري، باور مو دا دی، چې زموږ مجاهد ملت په دې برخه کې له خپل حکومت سره پوره همکاري کوي.
مولوي عزيزي دا هم وويل: د تېر شل کلن اشغال پرمهال د هېواد ډېری تاریخي ځایونه غصب شوي و، چې د نوي نظام له راتګ سره د غصب مخه نیول شوې او یادې سیمې د غاصبینو له منګولو خلاصې شوي.
د هغه په وينا؛ د هېواد په کچه د ۵ زرو په شاوخوا کې تاریخي ځایونه او ابدات ثبت او راجستر دي، چې د اطلاعاتو او کلتور وزارت له لوري د صفر ۱۲ ځانګړې قطعه فعاله او له نورو امنیتي ځواکونو سره په همغږۍ له یادو سیمو ساتنه کوي.

۱۴۴۵/۵/۱۵ هـ ش
۱۴۰۲/۹/۸ هـ ق