د اطلاعاتو او کلتور وزارت د خپرونو چارو معین هرات ته سفر وکړ
د اطلاعاتو او کلتور وزارت د خپرونو چارو معین مولوي مهاجر فراهي هرات ولایت ته د خپل سفر پر مهال د یاد ولایت د اطلاعاتو او کلتور له رئیس مولوي احمدالله متقي سره وکتل.
د هرات د اطلاعاتو او کلتور رئیس د یادې ادارې د فعالیتونو او لاسته راوړنو راپور د خپرونو چارو معين ته وړاندې کړ او د ياد رياست ستونزې او غوښتنې یې ورسره شریکې کړې.
مولوي مهاجر فراهي د هرات د اطلاعاتو او کلتور ریاست د ستونزو او غوښتنو تر اورېدو وروسته وویل: دا موضوعات به د حل په موخه د وزارت له مقام سره شریک کړي.
همداراز نوموړي د اتفاق اسلام ورځپاڼې د پیاوړتیا خبر ورکړ او ويې ویل: د وزارت په کچه هڅې روانې دي، ترڅو د دې ورځپاڼې کیفیت ښه شي او تیراژ یې زیات شي.
ښاغلي فراهي د خبریالانو پر ملاتړ ټینګار وکړ او ویې ویل: د ویاندویانو او مطبوعاتي مسؤلینو لپاره د سمینارونو په ترڅ کې پر دې ټینګار شوی، چې خبریالانو ته ځوابونه او پر وخت اطلاعات ورکړل شي.
په دې لیدنه کې د اتفاق اسلام ورځپاڼې پراختيا، ولسوالیو ته د کتابتونونو جوړول، د بهرنیو ګرځندویانو لپاره د ځانګړي هوټل جوړول، د نړیوالو نندارتونونو د جوړولو اسانتیاوې برابرول او د تاریخي آبداتو لپاره د ځانګړي بودیجې ځانګړې کول له مهمو موضوعاتو څخه وو، چې د اطلاعاتو او کلتور وزارت د خپرونو چارو له معین سره شریک شول.
۱۴۴۶/۷/۲۸ ق
۱۴۰۳/۱۱/۱۰ ل
