د اطلاعاتو او کلتور وزارت اړوند د ګرځندوی او هوټلدارۍ انسیټیټوټ درسي بهیر پیل شو
سهشنبه (د ۱۴۴۷ د شوال المکرم ۲۷مه) د اطلاعاتو او کلتور وزارت د ګرځندوی، مالي او اداري معینیت اړوند د ګرځندوی د تحقیق او پراختیا ریاست د ګرځندوی او هوټلدارۍ انسیټیټوټ درسونه پیل شول، په دې اړوند جوړه شوې غونډه کې د ګرځندوی، مالي او اداري معین مولوي قدرتالله جمال ترڅنګ د ګرځندوی د تحقیق او پراختیا رئیس مولوي محمد صادق صداقت، د عامه اړیکو رئیس او ویاند قاري خبیب غفران، د وزارت یو شمېر آمرینو، استادانو او زده کړیالانو ګډون کړی و.
د یاد انسیټیټوټ مسؤلینو وویل: د ګرځندوی او هوټلدارۍ د انسیټیټوټ موخې د مسلکي ځوانان روزل، د سیاحتي خدماتو معیاري کول، د کاري فرصتونو د رامنځته کولو او د سیلانیانو د جذب له لارې د هېواد اقتصاد ته ودې ورکول دي.
د انسیټیټوټ آمر مولوي محمد زمان ناصري او د دې انسیټیټوټ یوه تن زده کړیال د انسیټیټوټ د ارزښت او اهمیت په اړه خبرې وکړې او خپلې ستونزې، وړاندیزونه او غوښتنې یې د ګرځندوی له معین سره شریکې کړې.
ورته وخت کې د ګرځندوی، مالي او اداري معین مولوي قدرتالله جمال وویل: دغه انسیټیټوټ تر دې دمه څو دورې زده کړیالان فارغ کړي دي، چې زیاتره فارغ شوي ځوانان اوس مهال په بېلابېلو هوټلونو کې په کار بوخته دي. ښاغلي جمال د سیاحت او ګرځندوی سکتور د هېواد له مهمو اقتصادي ستنو څخه وباله او زیاته یې کړه، چې د همدې سکتور له لارې له نړۍ سره اغېزمنې اړیکې جوړېدلی شي.
ښاغلي جمال له زده کړیالانو څخه وغوښتل، چې له شته فرصتونو څخه ښه ګټه واخلي او په نظري او عملي زدهکړو کې لا زیات زیار وباسي، ترڅو په راتلونکي کې سیلانیانو ته باکیفیته خدمات وړاندې کړی شي، همداراز ښاغلي جمال ډاډ څرګند کړ، چې د زده کړیالانو او انسیټیټوټ ستونزو او وړاندیزونو ته به هر اړخیزه پاملرنه وشي.
د غونډې په لړ کې د عامه اړیکو رئیس او ویاند قاري خبیب غفران وویل: د خوښۍ ځای دی چې ځوانان په امن فضا کې په زدهکړو بوخت دي او همدغه زده کړیالان کولای شي، چې نړیوالو ته د هېواد د سیاحتي، تاریخي او لرغونو برخو رښتینی انځور وړاندې کړي.
نوموړي زیاته کړه، چې د څو لسیزو جګړو له امله، د نورو برخو تر څنګ د سیاحت سکتور هم زیانمن شوی، خو له نېکه مرغه د اطلاعاتو او کلتور وزارت دې برخې ته ځانګړې پاملرنه کړې او هڅه کوي چې دا سکتور په مسلکي ډول وده وکړي او سیلانیانو ته غوره خدمات وړاندې شي.
۱۴۰۵/۱/۲۵ هـ ش
