د اطلاعاتو او کلتور رئيس د ځوانو استعدادونو د تجارتي مهارتونو د پراختيا له مرکزونو څخه ليدنه وکړه
د جوزجان ولايت د اطلاعاتو او کلتور رئيس مولوي سیف الدين معتصم د ياد ولايت د اقتصاد د رئيس مولوي محمد ظريف فایز، د صنعت او سوداګرۍ د رئيس نياز محمد تواب او د اکټېډ ولايتي دفتر د رئيس انجینر امان الله امين په ملتيا د ځوانو استعدادونو د تجارتي مهارتونو د پراختيا له مرکزونو څخه ليدنه وکړه.
د اطلاعاتو او کلتور رئيس مولوي سیف الدين معتصم وویل: ځوانان د ټولنې د ملا تير او راتلونکي جوړوونکي دي، اړتيا ده، چې ځوانان له شته فرصتونو ګټه واخلي، نوموړي د ښوونیزو مرکزونو له استادانو وغوښتل، چې د ځوانانو د فکري ودې او تدریس په برخه کې له پوره ایماندارۍ او اخلاص څخه کار واخلي.
د جوزجان ولایت یو شمېر ځوانانو د اسلامي امارت له رهبرۍ څخه د وړیا زده کړو د زمينې برابرولو له امله مننه وکړه او د دغه تعلیمي بهیر د دوام غوښتنه یې وکړه.
د يادونې وړ ده، چې اوسمهال په یادو ښوونيزو مرکزونو کې ۳۸۰ تنه ځوانان د کمپيوټر، انګليسي ژبې او ګرافيک ډيزاين په څانګو کې روزل کېږي.
۱۴۴۶/۴/۲۳ هـ ق
۱۴۰۳/۸/۵ هـ ل
