د اطلاعاتو او فرهنګ ریاست مسؤلینو د رسنیو له مسؤلینو سره ناسته وکړه
د هرات اطلاعاتو او فرهنګ ریاست مسوولینو د همغږۍ د پیاوړتیا او د اطلاع رسونې د بهیر د ښه والي په موخه، د رسنیو له استازو سره ناسته وکړه.
د اطلاعاتو او فرهنګ ریاست مسؤلین وایي، چې د دې غونډې له جوړولو څخه موخه د رسنیو او د اطلاعاتو او فرهنګ ریاست ترمنځ د لا زیاتې همغږۍ رامنځته کول دي، ترڅو خلکو ته د کره، چټکو او مسوولانه معلوماتو د خپرولو بهیر اسانه شي.
مسؤلینو زیاته کړه، چې رسنۍ په عامه پوهاوي کې مهم رول لري او د رسنیو او د اطلاعاتو او فرهنګ ریاست ترمنځ نږدې همکاري کولای شي د شفافیت او ښې اطلاعرسونې لامل شي.
ورته مهال ګډونوالو د رسنیو او د اطلاعاتو او فرهنګ ریاست ترمنځ د همکارۍ پر پیاوړتیا ټینګار وکړ او ویې ویل: دا ډول ناستې کولای شي، چې د رسنیو او امارتي ادارو ترمنځ غوره همغږي رامنځته کړي او خلکو ته د دقیقو او پر وخت معلوماتو رسولو بهیر ښه کړي.
۱۴۴۷/۱۱/۹ هـ ق
