دایکندي کې د بادام ګل فرهنګي دوديزه میله ترسره شوه

د دايکندي ولايت د اطلاعاتو او کلتور رياست له لوري په مرکز نيلي کې د بادام ګل فرهنګي او هنري دودیزه ميله د محلي ادارو د مسؤلينو، علماوو، قومي مشرانو، شاعرانو، ليکوالانو او ځوانانو په ګډون ترسره شوه.
د دایکندي د اطلاعاتو او کلتور رياست رئيس سید مصطفی صالح د ميلې ګډونوالو ته د ښه راغلاست ویلو ترڅنګ د بادام ګل دودیزه میله مهمه وبلله او زياته يې کړه؛ د اسلامي امارت نظام يواځې سياسي نظام نه دی، بلکې ټولنيز، نظامي، سياسي، اقتصادي او شرعي نظام دی، نوموړي له ټولو ولسونو غوښتنه وکړه، چې په يووالي سره له دې نظام څخه ملاتړ وکړي او د هيواد په پرمختګ کې برخه واخلي.
ورپسې د ميلې ګډونوالو شاعرانو، نعت ويونکو او ليکوالانو خپل شعرونه، مقالې، ترانې او نعتونه ګډونوالو ته وړاندې کړل او د تياتر د ممثلينو له لوري طنزيه نمایش اجرا شو.
د دايکندي د بادام ګل دوديزه ميله يوه فرهنګي، هنري او ټولنيزه ميله ده، چې هر کال د بادام د ګل د غوړېدو پر وخت د ياد ولايت د طبيعي او تفريحي ځايونو د معرفي کولو په موخه ترسره کيږي.
 
۱۴۴۶/۲/۲ هـ ق
۱۴۰۳/۵/۱۶ هـ ل