خوست کې د کتابونو درې ورځنی نندارتون پرانېستل شو

د خوست د اطلاعاتو او فرهنګ ریاست له لوري د کلمات علمي او تحقیقاتي ادارې په همکارۍ د کتاب او کتاب لوستنې فرهنګ پیاوړتیا او  کتاب لوستنې ته د ځوانانو هڅولو په موخه درې ورځنی نندارتون پرانېستل شو، چې پکې شاوخوا لس زره ټوکه بېلابېل کتابونه نندارې ته ایښودل شوي دي.
د خوست د اطلاعاتو او فرهنګ رئیس مولوی محمد صابر صابري د دغه نندارتون جوړولو په اړه خبرې وکړې او له زده کړیالانو، زده کوونکو او د مطالعې له مینوالو څخه یې وغوښتل، چې په دې نندارتون کې په پراخه کچه ګډون وکړي او د خپلې خوښې کتابونه واخلي او مطالعه یې کړي.
دغه راز په نندارتون کې یو شمېر نورو ویناوالو هم د کتاب او کتاب لوستنې په اړه خبرې وکړې او ویې ویل: که څه هم ټیکنالوژي د اسانتیاوو ښه ادرسونه دي، خو باید له مطالعې څخه مو منع نه کړي او په علمي معلوماتو کې له کتابونو څخه استفاده وشي.
ویناوالو په خپلو خبرو کې له زده کړیالانو، زده کوونکو او ټولو ګډونوالو وغوښتل: چې کتاب واخلئ٦ او مطالعه وکړي، ځکه له نړۍ سره د سیالۍ کولو بهترینه وسیله مطالعه ده.
د یادونې وړ ده، چې یاد نندارتون به درې ورځې دوام وکړي او هره ورځ به له سلګونو د امارتي او خصوصي لیسو زده کوونکو څخه په انتخاب شويو مختلفو کتابونو کې ازموینه اخیستل کیږي او تکړه زده کوونکي به په ډالیو هم ستایل کیږي.

۱۴۴۸/۳/۲۵ هـ ق