ترکیه د افغانستان د کلتوري میراثونو په ساتنه کې همکاري کوي

د اطلاعاتو او کلتور وزارت د هنر او کلتور معین مولوي عتیق الله عزیزي په خپل کاري دفتر کې د ترکیې هېواد د همغږۍ او همکارۍ اژانس ( ټیکا ) مؤسسې له مسؤل فاضل آکین اردوغان سره لیدنه وکړه. 
په دغه لیدنه کې د ټیکا مؤسسې مسؤل ښاغلي اکین د یادې موسسې د فعالیتونو په تړاو معلومات وړاندې کړل او زیاته یې کړه؛ چې د ترکانو او افغانانو د ګډو کلتوري مشترکاتو او اوږدې ملګرتیا له مخې به  د افغانستان د تاریخي ابداتو په رغونه، د ملي آرشیف ، هنرستان او عامه کتابتونونو د تجهیز په برخه کې خپله همکاري پراخوي.
 د ټیکا مؤسسې مسؤل وویل: د خپلو پرمختیایې او کلتوري برنامو له مخې به په نژدې ورځو کې د مولانا جلال الدین محمد  بلخې د والد د مدرسې او خانقا له سروې ورسته به يې د بیارغونې لپاره لاس په کار شي. 
د هنر او کلتور معین مولوي عتیق الله عزیزي د یادې مؤسسې له اغیزمنو فعالیتونو مننه وکړه او زیاته یې کړه؛ چې ترکیې تل د افغانستان سره په پرمختیایې او کلتوري کارونو کې مرسته کړې ده.

۱۴۴۶/۴/۷ هـ ق
۱۴۰۳/۷/۱۹ هـ ل