تاريخي آثار د هېواد د پېژندنې سرچينې دي

د اطلاعاتو او کلتور وزارت سرپرست ملا خیرالله خيرخواه د بدخشان ولايت د اطلاعاتو او کلتور له رئيس سره د ليدنې په ترڅ کې وويل: تاريخي آثار د هېواد پېژندنې سرچينې دي.
تېره ورځ د بدخشان ولايت د اطلاعاتو او کلتور رئيس الحاج معزالدين احمدي د تاريخي آثارو د ساتنې او قاچاق د مخنيوي په موخه د اطلاعاتو او کلتور وزارت سرپرست وزير ملا خيرالله خيرخواه سره د وزارت مقام کې ليدنه وکړه.
ملا خير الله خيرخواه وويل: د افغانستان اسلامي امارت د تاريخي اثارو د ساتنې په برخه کې پوره پاملرنه کوي او د هغو خلکو پر وړاندې چې تاريخي اثار قاچاق کوي او خپل سرې کيندنې کوي، جدي چلند کوي.
د بدخشان د اطلاعاتو او کلتور رئيس الحاج معزالدين احمدي وويل: بدخشان د هېواد يو له لرغونو ولايتونو څخه دی چې ۵۰۰۰ کلن تاريخي قدامت لري، ياد ولايت ډېر شمېر تاريخي آبدې او اثار لري چې تر دا مهاله ټولې نه دې کېندل شوې، د لرغونو ځايونو کېندنې لپاره مسلکي اشخاصو ته اړتيا ده چې په پوره پاملرنې او مسلکي ډول يې راوسپړي.
نوموړي د بدخشان ولايت د ۱۷ لرغونو آبدو د کشفولو په اړه هم معلومات شريک کړل او سرپرست وزير ملا خيرالله خيرخواه ته يې ډاډ ورکړ، چې د بدخشان ولايت د اطلاعاتو او کلتور رياست مسؤلين د لرغونو آثارو او آبدو په ساتنه کې مسؤلانه چلند کوي، نوموړي زياته کړه چې د بدخشان ولايت په سرحداتو کې د قاچاقبرانو موجوديت او د محافظينو د نشتون له امله ددې احتمال شته چې د تاريخي اثارو قاچاقبران په ډاډه زړه ياد اثار قاچاق کړي.
   د اطلاعاتو او کلتور وزارت د لرغونو آثارو او آبدو د ساتنې خبره په داسې مهال کوي چې د اسلامي امارت له حاکميته تر دې مهاله د لرغونو آثارو څو تنه قاچاقبران په سرحدونو کې د قاچاق پرمهال د امارتي ځواکونو له لوري نيول شوي دي.
۱۴۴۵/۶/۱۸ هـ ق
۱۴۰۲/۱۰/۱۰ هـ ش