بیهقي د کتاب خپرولو رياست کې د کتاب نړيواله ورځ ولمانځل شوه
سه شنبه ( ۱۴ د شوال المکرم ۱۴۴۵) د اطلاعاتو او کلتور وزارت اړوند بيهقي د کتاب خپرولو رياست ( ۲۳ د آپريل ) د کتاب نړيواله ورځ د يوې غونډې په ترڅ کې ولمانځله.
ياده غونډه کې د اطلاعاتو او کلتور وزارت مسؤلينو، د خپرندويه ټولنو غړو، د مطبعو استازو، ليکوالانو او د رسنيو استازو ګډون درلود، چې د قرانکريم د مبارکو اياتونو په تلاوت سره پيل شوه.
د بيهقي کتاب خپرولو رياست د چاپ او خپراوي آمر حميد الله وياړ وويل: بيهقي د کتاب خپرولو رياست د خصوصي خپرندويه ټولنو په همکارۍ د کتاب د نړيوالې ورځې لمانځغونډه برابره کړې ده، نوموړي زياته کړه؛ د کتاب ارزښت له دې څخه معلوميږي، چې الله تعالی خپل استازي هم د نړۍ د خلکو د هدايت لپاره له کتابونو سره راليږلي دي، د ننۍ نړۍ بیساری پرمختګ د کتاب له امله دی، بیهقي د کتاب خپرولو رياست په تېر کال کې د کتاب د ارزښتمن کولو او مطالعې ته د خلکو د هڅولو په موخه د کتابونو يوولس مرکزي او ولايتي نندارتونونه جوړ کړي دي، همدا ډول يې ګڼ شمېر ديني، فرهنګي او سياسي کتابونه چاپ کړي دي.
د ښاغلي وياړ په وينا: کتاب خپرونکي دې په بنيادي مسايلو د څيړنو کتابونه چاپ کړي، او د کتابونو لپاره دې د اطلاعاتو او کلتور وزارت څخه (ISBN) نمبر ترلاسه کړي، تر څو يې د کتاب د کاپي رايټ حقوق خوندي وي.
ورپسې د خصوصي خپرندويه ټولنو په استازيتوب سيد عبدالله پاچا، د ليکوالانو په استازيتوب استاد سید احمد سعيد، د اطلاعاتو او کلتور وزارت مشاور دوکتور نظام الدين شایق او د ياد وزارت د کاپي رايټ آمر مفتي عبدالحق حماد هم په نوبت سره د کتاب پر ارزښت خبرې وکړې.
همدا راز د غونډې په ترڅ کې ګډونوالو ته د بيهقي کتاب خپرولو رياست له لوري د کتابونو ډالۍ وويشل شوې او غونډه د دعايې په لوستلو سره پای ته ورسېده.
۲۰۲۴/۴/۲۳ میلادي
۱۴۰۳/۲/۴ هـــ ل
