بغلان کې د ځوانانو د همږغۍ او فکري روزنې په موخه غونډه ترسره شوه
د بغلان ولايت د اطلاعاتو او کلتور ریاست د ځوانانو چارو آمریت له لوري په مرکزي بغلان ولسوالۍ کې د رضاکاره ځوانانو د همږغۍ، علمي او فکري روزنې په موخه غونډه ترسره شوه.
د اطلاعاتو او کلتور رئیس مولوي اسدالله مصطفی هاشمي وویل: ځوانان دې په خپلو کې همږغي پیاوړې کړي او د فکري روزنې په برخه کې دې هغه خبرې او مفکورې وننګوي، چې د لویدیځو هیوادونو له باورونو، قوانينو او تاثراتو څخه اغیزمنې وي، په فکري روزنه سمبال ځوانان مسؤلیت لري، ترڅو د اسلامي نظام او افغاني ټولنې د ارزښتونو په رڼا کې ټولنیز ثبات رامنځته، د ځوانانو په منځ کې همږغي زیاته او نوی نسل ښه لوري ته وهڅوي.
د غونډې یو تن برخه وال ځوان عبیدالله وویل: د ځوان نسل د فکري اصلاح لپاره بايد غونډې په پراخ ډول ترسره شي، له رسنيو کار واخيستل شي او دغه راز د مساجدو امامانو ته دنده وسپارل شي، چې د خپلو مقتديانو د عقيدوي او فکري روزنې لپاره منظم پروګرامونه ترتيب کړي.
۱۴۴۶/۸/۵ ق
۱۴۰۳/۱۱/۱۶ ل
