بغلان کې د نشه يي توکو د زیانونو په اړه د عامه پوهاوي پروګرام ترسره شو
د بغلان د اطلاعاتو او فرهنګ ریاست له لوري د نشهيي توکو د زیانونو په اړه یو ورځنی د عامه پوهاوي پروګرام د علماوو کرامو، د ګذر وکیلانو او قومي مخورو په شتون کې ترسره شو.
دغه پروګرام د مشرتابه(حفظه الله) د فرمان د تطبیق په موخه جوړ شوی و، چې پکې د نشهيي توکو د زیانونو او له استعمال څخه یې د مخنیوي په برخه کې د علماوو او د ټولنې د بېلابېل قشرونو پر مسوولیتونو خبرې وشوې.
د بغلان ولایت د اطلاعاتو او فرهنګ ریاست مسؤلینو د اسلام له نظره د نشهيي توکو د زیانونو په اړه خبرې وکړې او ویې ویل: د ټولنې د سالم ساتلو لپاره د نشهيي توکو له زیانونو څخه د خلکو پوهاوی مهم دی.
په پروګرام کې نورو ویناوالو هم د اسلامي سپيڅلي دین او طب له نظره د نشه یي توکو د زیانونو په اړه خبرې وکړې او ویې ویل: د اسلام سپيڅلي دین د لارښونو په اساس هر نشه کوونکی توکی حرام دي. همدارنګه د نشهيي توکو استعمال د اسلامي لارښوونو خلاف عمل دی او د مخنیوي لپاره یې د علماوو او ټولنې بېلابېلو قشرونو ګډو هڅو ته اړتیا ده. نشهيي توکي د انسان پر مغز او عصبي سیستم ناوړه اغېزې لري، د زړه د فعالیت او د وینې د جریان ستونزې رامنځته کوي او د بېلابېلو ناروغیو لامل کیږي.
د پروګرام ګډونوالو د نشهيي توکو د زیانونو په اړه د عامه پوهاوي پر پراختیا او د نشهيي توکو د استعمال د مخنیوي په برخه کې د ګډو هڅو پر دوام ټینګار وکړ.
۱۴۴۸/۵/۸هـ ق
