بغلان کې د قرآنکریم د  حافظانو د همغږۍ غونډه ترسره شوه

پنجشنبه ( ۲۳ د جمادي الاول ۱۴۴۵) د بغلان د اطلاعاتو او کلتور ریاست د کلتور او ګرځندوی آمریت له لوري د قرآنکریم د حافظانو د همغږۍ غونډه ترسره شوه.
د بغلان د اطلاعاتو او کلتور  رییس مولوي اسدالله مصطفی هاشمي وویل: له دې ناستې څخه موخه د بغلان ولايت د مرکز او ټولو ولسوالیو د قرآنکریم د حافظانو ترمنځ د همغږۍ پیاوړي کول دي، تر څو د حُسن قرآت او نورو دیني برنامو د ترسره کولو پر مهال خپل لیدلوري سره شریک کړي او د برنامو د ښه ترسره کېدو په موخه سره همغږي شي.
نوموړي زیاته کړه؛ په نژدې راتلونکې کې به د بغلان حافظانو لپاره د همغږۍ یوه کمېټه هم جوړه شي، تر څو د دیني خپرونو د جوړولو پر مهال په لرې پرتو سیمو کې له حافظانو سره همغږي وکړي او په خپلواک ډول د حافظانو د استازولۍ مسؤلیت پر غاړه واخلي.
د کلتور او ګرځندوی آمر مولوي عزت میرحقاني وویل: هڅه یې دا ده چې د دغه ډول ناستو په ترسره کولو سره د ټولو دیني عالمانو او په ځانګړي ډول د قرانکريم د حافظانو ترمنځ د همغږۍ رامنځته کولو او اړیکو د جوړولو زمینه برابره کړي.