بادغیس کې د رسنیو مسؤلینو او د امارتي ادارو ویاندویانو سره د همغږۍ ناسته وشوه

د بادغیس ولایت اطلاعاتو او کلتور ریاست له لوري د رسنیو مسؤلینو، خبریالانو او امارتي ادارو ویاندویانو سره د همغږۍ ناسته وشوه.
د اطلاعاتو او کلتور رئیس آخندزاده مطیع الله متقي په ټولنه کې د رسنیو پر مهم رول ټینګار وکړ او ویې ویل: رسنۍ باید د حقایقو په پام کې نیولو سره فعالیت وکړي او دا یې مسؤلیت دی، چې د خلکو لپاره سم، دقیق او اړین مطالب خپاره او نشر کړي، بې‌ طرفي د رسنیو له مهمو اصولو څخه ده، چې باید رعایت شي.
ښاغلي متقي د رسنیز نظم په تأمین او د ناسمو معلوماتو د خپرېدو په مخنیوي کې د همغږۍ رول اساسي وباله او د سیمه ‌ییزو رسنیو مسؤلینو څخه یې وغوښتل، چې د رسنیزو قوانینو، اصولو او د اسلامي امارت د تګلارې په پام کې نیولو سره فعالیت وکړي او د عامه پوهاوي د لوړولو لپاره اغېزمن او مسؤلانه کار وکړي.
د ناستې په وروستیو کې خبریالانو، د رسنیو مسؤلینو او د امارتي ادارو ویاندویانو خپلې ستونزې، وړاندیزونه او نظرونه شریک کړل.

۱۴۴۷/۵/۲۷ هـ ق