کاپیسا کې د رسنیو له مسؤلینو او د امارتي ادارو له ویاندویانو سره د همغږۍ ناسته وشوه
د کاپیسا اطلاعاتو او کلتور رئیس په مشرۍ د رسنیو له مسؤلینو او د امارتي ادارو له ویاندویانو سره د همغږۍ ناسته وشوه.
په دې ناسته کې د اطلاعاتو او کلتور رئیس له رسنیو څخه د امارتي ادارو او هېواد ملي ګټو اړوند موضوعاتو د غوره رسنیز کولو له امله د مننې کولو ترڅنګ د خبریالانو ترمنځ د لازیاتې همغږۍ پر پیاوړتیا باندې ټینګار وکړ.
نوموړي له خبریالانو څخه وغوښتل چې د خبریالي مسلکي اصول او رسنیز اخلاق مراعت کړي او د عامه افکارو مثبت لور ته هڅولو په برخه کې کوښښ وکړي.
د غونډې په لړ کې، د رسنیو مسؤلینو د اطلاعاتو او کلتور ریاست له ملاتړ څخه د مننې کولو ترڅنګ معلوماتو ته د ښه لاسرسي او د شته ستونزو د حل غوښتونکي شول، چې د اطلاعاتو او کلتور ریاست مسؤلینو له لوري د پوره همکاریو او د ستونزو د حل ډاډ څرګند شو.
۱۴۴۷/۱۰/۲۹ هـ ق
