(د افغانستان اقتصادي رنسانس) کتاب مخکتنه وشوه

د اطلاعاتو او کلتور وزارت اړوند د عامه کتابتونونو ریاست له لوري د لیکوال عبدالوافي نایبزي لیکلي آثر (د افغانستان اقتصادي رنسانس) مخکتنه وشوه.
د مخکتنې په دې غونډه کې د عامه کتابتونو رئیس دوکتور رفیع الله صمیم وویل: د خوښۍ ځای دی، چې د عامه کتابتونونو ریاست نن ورځ بیا د یوې علمي غونډې کوربه دی او اوس مهال د لیکوالۍ او مطالعې په برخو کې د مثبتو بدلونونو شاهدان یو.
ښاغلي صمیم له لیکوال عبدالوافي نایبزي څخه د مننې کولو ترڅنګ له ټولو استادانو، زده کړیالانو، د مدارسو طالبالعلمانو، زده کوونکو او لوستو ځوانانو څخه وغوښتل چې خپل علم د قلم او لیکوالۍ په وسیلې راتلونکو نسلونو ته انتقال کړي، ترڅو هېواد کې د علمي پرمختګونو شاهدان اووسو او په بشپړه توګه هېواد له نورو هېوادونو سره سیال کړو، همدارنګه ښاغلي صمیم زیاته کړه، چې د عامه کتابتونونو تالارونه د ټولو ځوانانو پر مخ خلاص دي او هڅې کېږي چې دغه تالارونه د شپې پر مهال هم د کتاب او مطالعې مینوالو پر مخ خلاص پاتې شي.
دغه راز په غونډه کې نورو ویناوالو د (د افغانستان اقتصادي رنسانس) کتاب لیکلو له امله له ښاغلي نایبزي څخه د مننې کولو ترڅنګ د یاد کتاب په اړه خبرې وکړې او ویې ویل: له ښاغلي نایبزي څخه مو هیله ده، چې د تېر په څېر خپلو هڅو ته دوام ورکړي او راتلونکي ته د هېواد اقتصادي ودې په موخه نور کتابونه او علمي مقالې هم ولیکلي.
د غونډې په پای کې د یاد کتاب لیکوال عبدالوافي نایبزي د عامه کتابتونو له ریاست څخه د یادې غونډې جوړولو له امله مننه وکړه او ویې ویل: لیکوالان د نورو لپاره ژوند کوي او ټولنه پر ټولو حق لري د همدې حق اداء کولو په موخه مو دغه کتاب لیکلو ته مخه کړه او هیله ده، چې راتلونکي کې دوهم ځل هم چاپ شي.
د یادونې وړ ده، چې (د افغانستان اقتصادي رنسانس) کتاب د ښاغلي نایبزي شلم لیکلی کتاب دی، چې پکې ملي اقتصاد، پولي اقتصاد، نړیوال اقتصاد، کوچنی اقتصاد، اداره او مدیریت او نور ګڼ شمېر اقتصادي تحلیلونه په ښه توګه تشریح شوي دي.

۱۴۴۷/۱۰/۲۹ هـ ق