بدخشان کې د لرغونو آبداتو او تاریخي سیمو د ساتنې په موخه د همغږۍ ناسته وشوه
د بدخشان ولایت د اطلاعاتو او کلتور ریاست مسؤلینو د بېلابېلو امارتي ادارو استازو سره د تاریخي آبداتو د ویجاړېدو د مخنیوي او د فرهنګي میراثونو د ساتنې په موخه د همغږۍ میاشتنۍ ناسته وکړه.
په یاده ناسته کې د اطلاعاتو او کلتور ریاست اړوند د اطلاعاتو آمر د تاریخي ارزښتونو د ساتنې په برخه کې د اړوندو ادارو پر هر اړخیزې همکارۍ ټینګار وکړ او ویې ویل: د فرهنګي میراثونو د ساتنې قانون له مخې، د تاریخي آثارو په ساتنه کې ولسونه او امارتي ادارې ګډ مسؤلیت لري. د اطلاعاتو آمر د زیباک ولسوالۍ د (دیوانه شاه) مقبرې د اورلګېدنې پېښې ته په اشارې، د داسې پېښو د تکرار د جدي مخنیوي غوښتنه وکړه.
دغه راز د ولایت مقام استازي وویل: د تاریخي آبداتو د ساتنې په موخه د لاښې همغږۍ په پار یوه مصوبه چمتو او ۲۸ ولسوالیو ته استول شوې ده، تر څو اړوندې ادارې د لرغونو آبداتو ساتنې په برخه کې خپل مسؤلیت په جدي ډول ترسره کړي، د ولایت مقام استازي زیاته کړه؛ چې د بدخشان تاریخي هویت د دې ولایت یوه مهمه شتمني ده او باید خوندي وساتل شي.
په ورته وخت کې د اطلاعاتو او کلتور ریاست د کلتوري میراثونو د ساتنې مدیر وویل: د بدخشان جغرافیایي موقعیت، ملي او نړیوال شهرت د تاریخي ارزښتونو او لرغونو آثارو پر بنسټ ولاړ دی او هر کال له دغو سیمو څخه کورني او بهرني ګرځندویان او څیړونکي لیدنه کوي.
۱۴۴۷/۶/۲۰ هـ ق
