د اطلاعاتو او کلتور وزیر د بهر مېشتو افغانانو مشورتي جرګې له استازو سره وکتل
نن یکشنبه ( ۲۲ د شوال المکرم ۱۴۴۶) د اطلاعاتو او کلتور وزیر الحاج ملا خیرالله خیرخواه په خپل کاري دفتر کې د بهر مېشتو افغانانو مشورتي جرګې له یو شمېر استازو سره وکتل.
په پیل کې د بهر مېشتو افغانانو مشورتي جرګې د ګډونوالو په استازولۍ نور حکیم یار د خپلو فعالیتونو په اړه معلومات ورکړل او ویې ویل چې دغه جرګه له افغانستان اسلامي امارت، هېوادوالو او نړیوالو سره د خبرو تفاهم او همکارۍ له لارې په افغانستان کې د ثبات او پرمختګ لپاره کار کوي.
ښاغلي حکیم یار په بېلابېلو برخو کې د اسلامي امارت لاسته راوړنې وستایلې او زیاته یې کړه چې په هېواد کې اسلامي نظام په ډېرو قربانیو واکمن شوی چې د ساتنې لپاره یې باید ډېرې هڅې وشي.
ورپسې د اطلاعاتو او کلتور وزیر الحاج ملا خیر الله خیرخواه د یادې جرګې د ستونزو، غوښتنو او وړاندیزونو د اورېدلو ترڅنګ وویل: د افغانستان اسلامي امارت ټول مشران او مسئولین په هېواد کې د اسلامي نظام د ساتنې، د هېواد د آبادۍ او پرمختګ او همدارنګه د هېوادوالو د هوساینې لپاره شپه او ورځ هڅې کوي او د خلکو د ستونزو لپاره د حل لارې لټوي.
ښاغلي خیرخواه زیاته کړه چې په هېواد کې د اسلامي نظام په بیا واکمنېدو سره د افغانانو ترمنځ کرکې له منځه تللې او د هرې ورځې په تېرېدو سره یووالي پیاوړی کېږي، نو اوس د دې وخت دی چې ټول د اسلامي نظام په ساتنه کې خپل مسئولیت ترسره او ملاتړ یې وکړي. په پای کې د هغوی د ستونزو او غوښتنو د حل په برخه کې د همکارۍ ډاډ ورکړل شو.
