په ننګرهار کې د زون په کچه ځوانانو لپاره د فريلانسنګ مرکز جوړېږي
ننګرهار ولايت کې د اطلاعاتو او کلتور وزارت د ځوانانو چارو معينيت او اسلاميک ریلیف مؤسسې له لوري د فريلانسنګ زده کړو مرکز جوړيږي.
د اطلاعاتو او کلتور رياست مسؤلين وايي: د ځوانانو چارو معينيت د اسلاميک ريليف مؤسسې سره په ګډې همږغۍ د هېواد په ټولو زونونو کې ځوانانو لپاره د فريلانسنګ زده کړو ترلاسه کولو په موخه مرکزونه جوړوي، چې په همدې پار نن د يادې مؤسسې مسؤلينو د اطلاعاتو او کلتور رئيس قاري احسان الله ساجد او د ځوانانو چارو آمر قاري محمد آصف زهير سره د زون په کچه ځوانانو لپاره د فريلانسنګ زده کړو ترلاسه کولو مرکز جوړېدو په موخه وکتل.
يادو مسؤلينو وويل: پر ليکه زده کړې يا فريلانسنګ په ننني عصر کې د ځوانانو د روزنې لپاره لويه اړتيا ده، په همدې اساس غواړو ستاسو په همږغۍ د ختيځ زون په کچه ننګرهار کې ځوانانو لپاره د فريلانسنګ زده کړو يو لوی مرکز جوړ کړو، چې ياد مرکز به ځوانانو سره د دندو په پيدا کولو او نورو برخو کې ډېره مرسته وکړي.
دوی د فريلانسنګ سربېره په نورو برخو کې هم ځوانانو لپاره د زده کړو زمينې برابرولو ژمنه وکړه.
ورپسې د ننګرهار د اطلاعاتو او کلتور رئيس د اسلاميک ريليف مؤسسې له مسؤلينو مننه وکړه، چې د هېواد د ځوانانو روزنې په برخه کې نظام سره اوږه په اوږه ولاړ دي، هغه دغه راز په ياده برخه کې د مؤسسې مسؤلينو ته د هر راز همکارۍ ډاډ ورکړ.
۱۴۴۶/۷/۱۴ ق
۱۴۰۳/۱۰/۲۶ ل
