هلمند کې له رسنيو سره د همږغۍ میاشتنۍ غونډه تر سره شوه
د هلمند ولایت د اطلاعاتو او کلتور ریاست له لوري د یاد ریاست د غونډو په تالار کي د رئیس حافظ عبدالباري راشد په مشرۍ د دولتي ادارو ویاندویانو، د ریاستونو نشراتي مسؤلینو، د سیمه ییزو رسنیو مسؤلینو او خبریالانو سره د همږغۍ میاشتنۍ غونډه تر سره شوه.
پیل کې د اطلاعاتو او کلتور ریاست رئیس وویل: د اطلاعاتو او کلتور ریاست هڅه کوي، تر څو د سیمه ییزو رسنیو مسؤلینو او خبریالانو ته په هره برخه کي اسانتیاوې برابرې کړي، پام کي ده، تر څو دولتي او سیمه ییزو نشراتي مسؤلینو او خبریالانو ته د ظرفیت لوړونې په برخه کي سمینارونه جوړ کړو، تر څو د رسنیز کهول او دولت تر منځ لا زیاته همږغي او همکاري رامنځته شي.
د اطلاعاتو آمر مولوي شیرمحمد وحدت په خپلو خبرو کې وویل: له میاشتنۍ غونډو څخه موخه دا ده، ترڅو د دولتي ادارو د ویاندویانو او محلي رسنیو له مسؤلینو سره همږغي زیاته شي، د اطلاعاتو او کلتور ریاست له رسنیو سره همکار دی، ترڅو رسنیو سره په رسنیزو فعالیتونو کې پر وخت مرسته وکړي او هغه ستونزې چې رسنۍ ور سره لاس او ګریوان دي پر وخت حل او فصل کړي.
د همږغۍ په دغه ناسته کې د رسنیو مسؤلینو او خبریالانو په نوبتي ډول خبرې وکړې او تر هر څه وړاندې یې په دې ولایت کي د اطلاعاتو او کلتور ریاست هڅي وستایلې او ویې ویل: تېر ته په کتو اوس وخت کي تر بل هر وخت خبريالانو ته د معلوماتو په برخه کي لاسرسی زیات شوی دی.
۱۴۴۶/۴/۲۱ هـ ق
۱۴۰۳/۸/۳ هـ ل
