په واټونو، څلور لارو او مقدسو ځایونو هغه نومونه ايښودل کېږي، چې دیني او ملي ارزښت ولري
د هېواد د مقدسو ځایونو، واټونو او څلورلارو د نومونې کمېسیون د اطلاعاتو او کلتور وزارت د هنر اوکلتور د معین مولوي عتیق الله عزیزي په مشرۍ خپله نوبتي ناسته ترسره کړه.
په ياده ناسته کې لومړی د کابل ښار د فاضل بیک د اوسېدونکو پر عريضو ورپسې د سرپل ښار د واټونو او د غزني په ګیلان ولسوالۍ کې د مشهور بازار سره سره د هېواد په کچه پر هغه موضوعاتو بحث وشو، چې د خلکو او قومونو لخوا یاد کمېسیون ته د واټونو، بازارونو او څلورلارو د نومونو په خاطر عارض شوي وو.
د هنر او کلتور معین مولوي عتیق الله عزیزي وویل: د یاد کمېسیون غونډې ښه پایلې لري او د کميسيون له غړو یې غوښتنه وکړه، چې د قومونو او خلکو پر عرض پاڼو باید ښه غور وشي، تر څو د کمېسیون پرېکړې د خلکو تر منځ نفاق او کرکه رامنځته نه کړي.
ښاغلي عزیزي زیاته کړه؛ په نوو واټونو، څلور لارو او مقدسو ځایونو بايد د اشخاصو پر ځای هغه نومونه کېښودل شي او غور ورباندي وشي، چې دیني او ملي نسبت او په خلکو کې ارزښت ولري.
ښاغلي عزیزي د ټاکل شوې کمېټې له غړو غوښتنه وکړه، چې د هغو سیمو چې د نومونو په سر اختلاف لري، له مشرانو،ادیبانو، محققينو او د ګذر له وکیلانو سره له نژدې لیدنه وکړي، اسناد یې باید په دقیقه توګه وڅېړل شي، تر څو اختلافات له منځه لاړ شي.
۱۴۴۶/۴/۱۴ ھـ ق
۱۴۰۳/۷/۲۶ ھ ل
