خروار ولسوالۍ کې د سېرت النبي صلی الله علیه وسلم سیالۍ پايلې اعلان شوې
د لوګر ولايت د اطلاعاتو او کلتور ریاست له لوري د خروار ولسوالۍ په کچه د ښوونځیو او مدرسو (۱۵۰) تنو زده کوونکو او ځوانانو څخه د سېرت النبي(ص) آزموینه اخیستل شوې وه، چې د پایلو له اعلان وروسته ۱۱ تنه مخکښ ګډونوال په ډاليو ورکولو وستایل شول.
د اطلاعاتو او کلتور رئیس رفیع الله صمیم وویل: دغه سیالۍ د خروار ولسوالۍ په کچه د دیني مدرسو او ښوونځیو د ۱۵۰ تنو زده کوونکو ترمنځ ترسره شوې وه، چې موخه يې د ځوانانو د معلوماتو پراختیا او د دوی ترمنځ د مطالعې فرهنګ پیاوړي کول وو.
همداراز د یادې ولسوالۍ څو تنو علماء کرامو په خپل وار سره ورته آزموینې د ځوان نسل د فکري رغښت او ويښتابه برخه کې مهمې وبللې او غواړي چې ورته نورې علمي سیالۍ او برنامې دې هم د ځوانانو لپاره ترسره شي.
د يادې سيالۍ لومړي مقام ګټونکي ته موبایل، دوهم مقام ګټونکي ته ساعت، او دریم مقام ګټونکي ته بېلابېل کتابونه، او پاتې نورومخکښو ګډونوالو ته هم کتابونه ډالۍ شول.
تر دې وړاندې هم د اطلاعاتو او کلتور ریاست له خوا، د سیرت النبي(ص) فکري روزنې او نورو برخو کې د ځوانانو او زده کوونکو ترمنځ علمي سیالۍ ترسره شوې دي.
۱۴۴۶/۴/۳ هـ ق
۱۴۰۳/۷/۱۵ هـ ل
