زابل په شاجوی ولسوالۍ کې یوه ادبي بهیر په فعالیت پيل وکړ
شنبه (۷ د شعبان ۱۴۴۵ هـ ق کال) د زابل شاجوى ولسوالۍ کې يوه ادبي بهير په فعاليت پيل وکړ او د اطلاعاتو او کلتور ریاست د کلتور او ګرځندوی آمریت په چوکاټ کې د سورغر په نوم ادبي بهیر خپله لومړنۍ مشاعره ترسره کړه چې لسګونه شاعرانو او عامو خلکو پکې ګډون کړی و.
د زابل د اطلاعاتو او کلتور ریاست د کلتور او ګرځندوی آمر عبدالولي بشرمل وویل؛ سورغر ادبي بهیر به له دې وروسته په اونیز ډول ادبي ناستې، مشاعرې او د شاعرانو د همغږۍ ناستې ترسره کوي.
د شاجوی یو شمېر شاعرانو وویل؛ له قلمي او ادبي پلوه شاجوی یوه غني ولسوالۍ ده، خو اړتیا وه څو دا ډول د شاعرانو د را ټولونې ناستې زياتې شي، چې له نیکه مرغه د اطلاعاتو او کلتور ریاست دا ګام واخیست او مونږ ته یې ادبي بهیر پرانیسته ترسره کړه.
