په ننګرهار کې د الفت په نوم نوې راډيو فعالیت پیل کړ
نن پنجشنبه (۱۴۴۵/۱/۲۴هـ ق) د ننګرهار ولایت په شینوارو ولسوالۍ کې د حقیقت مېډیا ګروپ له لوري د الفت په نوم یوې نوې راډیویي رسنۍ رسماً په فعالیت پیل وکړ، چې په پرانیستغونډه کې یې د ننګرهار اطلاعاتو او کلتور رئیس مولوي نور محمد حنیف، د اطلاعاتو آمر مولوي صدیق الله قریشي، د مخابراتو رئیس مولوي ذبیح الله ذکي او د ننګرهار ملي ټلوېزیون آمر مولوي امان الله عادل او یو شمېر نورو مسؤلینو ګډون کړی و.
په پیل کې یې ښاغلي حنیف وویل: زموږ دولت د بیان آزادۍ ته ژمن دی، چې ښه بېلګه یې نن په شینوارو کې د الفت راډیو پرانسته ده.
ورپسې د اطلاعاتو آمر په خپلو خبرو کې وویل: د اطلاعاتو او کلتور ریاست د ټولو هغو رسنیو ملاتړ کوي، چې د اسلامي اصولو او افغاني عنعناتو په چوکاټ کې خپل رسنیز فعالیتونه مخته وړي.
د رسنیو استازو د خپلو خبرو په ترڅ کې د مسؤلینو هڅې وستایلې او د دغو همکاریو د دوام غوښتنه یې وکړه.
