ګڼ شمېر زده کړیالانو ته د فکري اصلاح په موخه روزنیز سیمینارونه وړاندې شول
د غزني ولایت د اطلاعاتو او فرهنګ ریاست له لوري، د غزني پوهنتون او د غزني تخنیکي پوهنتون د ریاستونو په همغږۍ د یادو پوهنتونونو ګڼ شمېر زده کړیالانو ته د فکري اصلاح په موخه علمي سیمینارونه وړاندې شول.
د اطلاعاتو او فرهنګ رییس ملا حمیدالله نثار د عامه پوهاوي او فکري اصلاح په برخه کې مهمي او ارزښتمنې خبري وکړې او له ځوانانو څخه یې وغوښتل چې د تیرو یرغلونو په مهال تپل شویو افکارو چې د اسلامي شریعت او ملي ګټو پر خلاف دي په وړاندي مبارزه وکړي.
نوموړي د ناوړه دودونو د مخنیوي اړوند ۱۷ مه ګڼه فرمان د تشریح تر څنګ د مخدره توکو د زیانونو او د اسلامي امارت د لاسته راوړنو په اړه هم هراړخیز معلومات وړاندې کړل او ویې ویل: چې له مسلک او تخصص سره تعهد او امانت داري لازم دی.
همدارنګه، د اطلاعاتو او فرهنګ ریاست اړوند ښوونیز مرکز استاد د ټولنې د فکري ثبات او د فکري جګړې د ډولونو او پایلو په اړه وینا وکړه او د دغې جګړې پر وړاندې یې د مبارزې لپاره د خلکو او حکومت پر یووالي ټینګار وکړ.
په پای کې، د یادو پوهنتونو مسئولینو او زده کړیالانو د دغه ډول پروګرامونو جوړول د ځوانانو د فکري پوهاوي لوړولو او د حکومت او خلکو ترمنځ د اړیکو د پیاوړتیا لپاره اغېزمن وبلل او د ورته پروګرامونو د دوام غوښتونکي شول.
۱۴۴۸/۳/۱۷ هـ ق
