میدان وردګو کې د رواش فرهنګي، علمي او دودیزه مېله ولمانځل شوه
د میدان وردګو د اطلاعاتو او فرهنګ ریاست له لوري د بهسودو ولسوالۍ په یوه تفریحي سیمه کې د رواش په نوم فرهنګي، علمي او دودیزه مېله د یو لړ فرهنګي، ادبي او ورزشي مراسمو په ترڅ کې ونمانځل شوه.
په همدې موخه په جوړو شویو مراسمو کې د یاد ولایت والي ملا خیرالله خیرخواه، د اطلاعاتو او فرهنګ رئیس مولوي حبیبالله مجاهد، د علماوو شورا رئیس شیخ القران والحدیث عبدالهادي فضلي، د امارتي ادارو مسؤلینو، قومي مشرانو او ګڼ شمېر ولسي خلکو ګډون کړی و.
د میدان وردګو ولایت والي ملا خیرالله خیرخواه د سیمه ییزو فرهنګي پروګرامونو ارزښت ته په اشارې سره وویل: د دا ډول پروګرامونو جوړول د ولسونو ترمنځ د یووالي، فرهنګي ودې او اقتصادي پیاوړتیا لامل ګرځي.
په غونډه کې د علماوو شورا رئیس شیخ القران والحدیث عبدالهادي فضلي هم د فرهنګي ارزښتونو ساتنه د ټولنې مهمه اړتیا وبلله او ددې ترڅنګ یې د عالیقدر امیرالمومنین (حفظه الله) د اوولسمې ګڼې فرمان مهمې برخې د عامه پوهاوي په موخه له گډونوالو سره شریکې کړې، نوموړي له خلکو څخه وغوښتل چې د ناوړه دودونو مخه ونیسی.
دغه راز د اطلاعاتو او فرهنګ رئیس مولوي حبیبالله مجاهد وویل: فرهنګي مېلې د سیمې طبیعي ښکلاوې د کورنیو محصولاتو د معرفۍ او بازارموندنې په برخه کې ارزښتناک رول لري او زموږ هڅه دا ده، چې دا ډول پروګرامونه لا پراخه کړو.
د ښاغلي مجاهد په وینا د دغې غونډې جوړولو څخه موخه ۱۷مې ګڼې فرمان تر خلکو پورې رسول دي، تر څو ناوړه دودونه په ټولنه کي له منځه لاړ شی.
د مراسمو په وروستۍ برخه کې شاعرانو او ترنم ویونکو خپل شعرونه او ترانې وړاندې کړې او ورزشکارانو بېلابېل ورزشي نمایشونه هم ترسره کړل.
د یادونې وړ ده، چې د رواش فرهنګي، علمي او دودیزه مېله د اسلامي امارت له بیا واکمنېدو وروسته پیل شوې، د رواش دا څلورمه لمانځغونډه ده، چې په بهسودو ولسوالۍ کې جوړیږي د امارتي ادارو مسؤلینو ترڅنګ ګڼ شمیر ولسي خلک هم پکې ګډون کوي.
۱۴۴۷/۱۲/۴ هـ ق
