د اطلاعاتو او کلتور رئیس په مشرۍ د خبریالانو د خونديتوب کمېټې ګډه ناسته ترسره شوه
هرات کې د اطلاعاتو او کلتور رئیس مولوي احمدالله متقي په مشرۍ د خبریالانو د خوندیتوب کمیټې ناسته ترسره شوه.
مولوي احمدالله متقي د رسنیو او خبریالانو پر هر اړخیز ملاتړ ټینګار وکړ او ویې ویل: خبریالان د عامه پوهاوي په برخه کې مهم رول لري او هیله ده چې د کلتوري، ټولنیزو او اقتصادي پروګرامونو په خپرولو کې له پخوا څخه ډېره هڅه وکړي.
دغه راز د خبریالانو د خونديتوب کمېټې مسئول عبد الجمیل وقار او د خبریالانو د ملاتړ او څار کمېټې رئیس شمیل احمد مشعل وویل: د تیرو کلونو په پرتله د رسنیو اړوند ستونزې کمې شوي دي، د امارتي ادارو او رسنیو ترمنځ ښه همغږي موجوده ده او د خبریالانو خوندیتوب کمیټه د امارتي ادارو، نړیوالو بنسټونو او بېلابېلو موسسو په همغږۍ هڅې کوي، چې د خبریالانو د ملاتړ، روزنې او ظرفیت لوړونې په برخه کې بېلابېل پروګرامونه جوړ کړي.
ورته مهال خبریالانو د دغه ډول پروګرامونو له جوړېدو څخه مننه وکړه او اطلاعاتو ته د لا ښه لاسرسي، د شته ستونزو د حل او د مسئولینو د دوامدارو همکاریو غوښتنه یې وکړه.
۱۴۴۷/۶/۱۶ هـ ق
