د تاریخي ودانیو د خوندیتوب او د اسلامي کلتور غني کولو کلتوري کمیټې ناسته وکړه
د فاریاب د اطلاعاتو او کلتور رئیس مولوي شمس الدین محمدي په مشرۍ د تاریخي ودانیو د خوندیتوب او د اسلامي کلتور غني کولو کلتوري کمیټې ناسته وکړه.
په پیل کې د اطلاعاتو او کلتور رئیس مولوي شمس الدین محمدي د ناستې ګډونوالو ته د ښه راغلاست تر څنګ د تاریخي او کلتوري آبداتو د خوندیتوب په اهمیت ټینګار وکړ او ویې ویل: دغه آبدات زموږ د ملت د تمدن او د معنوي میراثونو یوه برخه جوړوي او د دغو آبداتو ساتنه په حقیقت کې د هېواد د تاریخ، فرهنګ او اسلامي ارزښتونو درناوی دی، ښاغلي محمدي د تاریخي آبداتو او ارزښتونو د ساتنې په موخه د اړوندو ادارو د هر اړخیزې همکاریو غوښته وکړه.
دغه راز د میمنې ښاروالۍ د فرهنګي او ټولنیزو چارو مدیر وویل: د میمنې ښاروالۍ د تاریخي او مقدسو ځایونو بیارغونې ته پوره چمتو ده.
د ناستې ګډونوالو د فاریاب ولایت د تاریخي ودانیو او مقدسو ځایونو د ساتنې او بیا رغونې په برخه کې په هر اړخیزو همکاریو ټینګار وکړ او ژمنه یې وکړه، چې د دې ارزښتناکو فرهنګي میراثونو د ساتنې په برخه کې به هيڅ راز هڅې و نسپموي.
۱۴۴۷/۵/۶ هـ ق
