د رسنیو د استازو، خبریالانو او د امارتي ادارو ویاندویانو سره د همغږۍ غونډه ترسره شوه

پکتیا کې د رسنیو د استازو، خبریالانو او د امارتي ادارو ویاندویانو د همغږۍ غونډه کې د دې ولایت مرستیال والي شېخ انعام الله صلاح الدين، د امر بالمعروف او نهې عن المنکر رئیس شېخ سید جمال جمالي، د پوهنتون استادانو، خبریالانو او امارتي ادارو ویاندویانو ګډون کړی و.

په پیل کې مرستیال والي صلاح الدین وویل: رسنۍ په یوه نظام کې مهمه اطلاعاتي وسیله ده او د اسلامي نظام ژبه ده، خبریالان دې هڅه وکړي چې د اسلامي نظام کړنې او حقیقي انځور نړیوالو ته ورسوي او د رسنیو له استازو څخه يې وغوښتل چې، د اسلامي نظام اصولو او کړنلارې په اړه د خلکو ذهنونه جوړ او د دغه نظام په دفاع کې خپل مسوولیت ترسره کړي.

ورپسې د اطلاعاتو او کلتور ریاست د اطلاعاتو آمر نیاز الله اصیل ځاځي وویل: لومړۍ باید رسنۍ او نظام سره همغږي ولري، که چېرې رسنۍ او نظام سره نږدېوالی ولري بیا په ښه ډول کولای شي چې رسنۍ د نظام او ولس ترمنځ نږدېوالی رامنځته کړي، په دې برخه کې څه نا څه کار شوی خو لازمه ده، چې لازیات کار وشي او د خپلو موخو لپاره ترې ګټه واخیستل شي، رسنۍ د نظام اصولو ته ژمنې دي او د دولت سره ښه همغږي لري.

۱۴۰۳/۹/۲۷ ھ ل
۲۰۲۴/۱۲/۱۷ مېلادي