د اطلاعاتو او کلتور وزارت لخوا په روسیه کې د میشتو افغانانو سره د ازادۍ ورځ ولمانځل شوه
د روسيې په پلازمينه مسکو کې د اطلاعاتو او کلتور وزارت له لورې د امريکايي اشغال څخه د ماتې او فتحې دريمه کليزه د یاد سفارت د سرپرست جمال ناصر غروال، فرهنګي اتشه فضل الهادي حمزه، پوځي اتشه احمد یاسر او هلته د میشتو افغانانو سره په ګډه د يوې شاندارې غونډې په ترڅ کې ولمانځل شوه.
مسکو کې د افغانستان د سفارت فرهنګي اتشه فضل الهادي حمزه د غونډې ګډونوالو ته د خپلو خبرو په ترڅ کې د اسد مياشتې ۲۴ ( له امريکايي اشغال څخه د خپلواکۍ ترلاسه کولو ورځي ) د مبارکۍ ترڅنګ، یاده ورځ د افغانستان په تاريخ کې له وياړه ډکه ورځ وبلله او زياته يې کړه: د اسلامي امارت مشرانو او مجاهدينو د اسد په ۲۴ مه د نړۍ تر ټولو ځواکمنې امپراطورۍ او متحدینو ته د عبرت درس ورکړ او هيواد ته يې ريښتيني خپلواکي ترلاسه کړه.
ددې تر څنګ یې روسیه کې میشتو افغانانو ته د اتحاد او اتفاق سپارښتنې وکړې، هغوی یې رښتني وحدت ته راوبلل.
د غونډې ګډونوالو افغانانو په خپلو ويناوو کې د امريکايي اشغال د پای او د اسلامي امارت د فتحې په اړه خپل احساسات بيان کړل، همداراز په مسکو کې د افغانستان د سفارت ډيپلوماتانو هم د اسلامي امارت د فتحې، د افغانانو ترمنځ د يووالي او له اسلامي امارت سره د همکارۍ په اړه خپل نظريات شريک کړل.
۱۴۴۶/۲/۱۱ هـ ق
۱۴۰۳/۵/۲۵ هـ ل
