د هېواد د تاریخي ځایونو، واټونو او څلورلارو د نومونې کمېسیون ناسته وشوه
د اطلاعاتو او کلتور وزارت د هنر اوکلتور معین مولوي عتیق الله عزیزي په مشرۍ د هېواد د تاریخي ځایونو، واټونو او څلورلارو د نومونې کمېسیون نوبتي ناسته ترسره شوه.
په پیل کې د کمېسیون ګډونوالو د هېواد د ځينو ولايتونو په شمول د کابل ولایت د يو شمېر ځایونو، واټونو او څلور لارو د نومونې او د نومونو په بدلون نظرونه ورکړل او له هر اړخیزو نظرونو وروسته ځینې لازمې پریکړې وکړې چې له مخې یې د ملي دفاع پوهنتون په انګړ کې تېر شوی نوی سړک دې د ملي دفاع پوهنتون سړک په نوم، د کابل ولایت د پنځمې حوزې اړوند فاضل بیک سیمه د فاضل بیک سړک او دیوان بیګي سیمه د دیوان بیګي سړک په نوم ونومول شول.
ورپسې د کمېسیون غړو د کابل ښاروالۍ د غوښتنې په اړه د امنیت، کرزي او صدراعظم ښارګوټو د نومونو په اړه پرېکړه وکړه، چې د یادو ښارګوټو د اوسېدونکو د سهولت له پاره دې په همدې نومونو پاتې شي.
همدارنګه کمېسیون د سرپل ولایت مقام د غوښتنې په اساس چې د ۵ څلور لارو د نومونو د بدلون غوښتنه کړې وه، پرېکړه وکړه چې کوم پخواني نومونه چې جامع او مناسب دي، هغه دې په خپلو پخوانیو نومونو پاتې وي او د شخص په نوم چې نومول شوي هغو ته دې نوي نومونه وټاکل شي.
۱۴۰۳/۱۰/۱۹ ه ل
۱۴۴۶/7/7 هـ ق
