په سمنګانو کې د دولت او رسنیو ترمنځ د همغږۍ غونډه جوړه شوه
تېره ورځ په سمنګان ولایت کې د اطلاعاتو او کلتور په ریاست کې د دولت او د رسنیو او خبریالانو د ستونزو د حل په موخه د همغږۍ ګډه ناسته ترسره شوه.
په جوړه شوې غونډه کې د سمنګانو ولایت د اطلاعاتو او کلتور رئيس مولوي فيروز الدين منيب، د غږيزو، چاپي، ويډيويي رسنيو مسؤلينو او استازو ګډون کړی و.
غونډه د قرآنکریم د مبارکو آیتونو په تلاوت سره پیل شوه، ورپسې د اطلاعاتو او کلتور رئیس مولوي فیروزالدین منیب د خبریالانو د ملي ورځې په مناسبت د مبارکۍ ترڅنګ وویل، د هېواد د رسنیو او خبریالانو وظیفه او مسؤلیتونه ډیر دي، د رسنیو مسؤلین او خبریالان دنده لري چې په خپلو خپرونو کې دقیق وي او د ژورنالیزم ټول معیارونه په نظر کې ونیسي.
همدا راز ښاغلي رئيس په خپلو خبرو کې وويل، ژورناليزم يوه سپېڅلې دنده ده او د غږيزو، چاپي او ويډيويي رسنيو په ګډون د رسنيو مسؤلين دنده لري، چې خلک او ټولنه د ملي يووالي، سوله ييز ژوند، يووالي، په لور راوبولي.
ورپسې د ولايتي ادارې وياند عبدالله هوتک، د پژواک خبريال سيد مجتبی مصلح، د پژواک خبريال سيف الله کريمي، فضل الرحمن ساعي، شاهد شاهد، د باختر آژانس عمومي مدير ويس احمد احساس او د ملي تلويزيون مسؤل علاء الدين رحيمي خبرې وکړې.
۱۴۴۴/۸/۲۷ هـ ق
۱۴۰۱/۱۲/۲۹ هـ ش
