د ځوان نسل فکري اصلاح او د ۱۷مې ګڼې فرمان د تشریح په اړه لسګونو زده کوونکو ته روزنیز سیمینار وړاندې شو
د پکتیا د اطلاعاتو او فرهنګ ریاست له لوري په دې ولایت کې د یوه ښوونیز مرکز لسګونو تنو زده کوونکو ته د ځوان نسل فکري اصلاح او د ۱۷مې ګڼې (ناوړه دودونو مخنیوي) فرمان د تشریح په اړه یو ورځنی روزنیز سیمینار وړاندې شو.
په سیمینار کې ویناوالو دا ډول پروګرامونه، د ځوانانو د فکري اصلاح په برخه کې اغېزمن وبلله او ویې ویل: که د امیرالمؤمنین (حفظه الله) ټول فرامین، احکام او هدایتونه په سمه توګه تطییق شي، نو د ټولنې د اصلاح او پرمختګ سبب به وګرځي.
دغه راز د پکتیا د اطلاعاتو او فرهنګ رئیس مولوي فیض الله جوهري د ۱۷مې ګڼې فرمان د تطبیق په اړه خبرې وکړې او له ځوانانو څخه یې وغوښتل چې د ناوړه دودونو د مخنیوي په موخه باید خلکو ته عامه پوهاوی ورکړي.
ورته مهال د ځوانانو چارو امر سیف الرحمن وهاج د مسلمان ځوان د مسؤلیتونو په اړه هراړخیزې خبرې وکړې او ځوانان یې خپلو مسؤلیتونو ترسره کولو ته وهڅول.
۱۴۴۸/۳/۲۰ هـ ق
