د اطلاعاتو او فرهنګ وزارت د مرکز او ولايتونو د رييسانو د رپوټ ورکولوغونډە پاى ته ورسېده
د اطلاعاتو او فرهنګ وزارت د سرپرست محمد طاهر زهير په ګډون نن د دغه وزارت د مرکزي برخو د رييسانو او آمرانو د رپوټ ورکولو غونډه جوړه شوه.
د باختراژانس خبريال د خبرله مخې؛ په دې غونډه کې چې د اطلاعاتو او فرهنک وزارت د معينانو، سلاکارانو او مسوولينو په ګډون د دغه وزارت د مطبوعاتو د نړيوال مرکز په تالار کې جوړه شوه. د اطلاعاتو او فرهنګ وزارت د مرکزي برخو د رييسانو او آمرانو د خپل تېريو کال د کارونو رپوټونه وړاندې کړل .
په دې غونډه کې د اطلاعاتو او فرهنګ وزارت د دفتر، د پاليسۍ اوپلان، د داخلي تفتيش، باختراژانس، دولتي ورځپانو، نشراتو ، بيهقي کتاب چاپولو، ملي موزيم ،لرغونپېژندنې، ملي نګارستان ، افغان فلم، موسيقۍ، د تاريخي ابداتو د ساتنې، د ملي تياتر،عامه کتابتونونو، ملي ارشيف، د خلکو د فرهنګ د پروګرامونو د همغږى ،د رضاکارو ځوانانو، د ځوانانو د خونديتوب، ګرځندوي، د ګرځندوي د تحقيق او بازار موندنې، بشري منابعو او د مالي او اداري رييسانو او مسوولينو او دغه راز د معلوماتي تکنالوژى، په ملکي خدمتونو کې د ښځو د ملاتړ (جندر ) او د تدارکاتو امريتونو مسوولينو د خپلو اړوندو بنسټونو د کارونو او برياليتوبونو د رپوټونو د وړاندې کولو په ترڅ کې خپلې يولړ ستونزې ،غوښتنې او اړتياوې هم وړاندې کړې.
دغه رازهغوى د ستونزو د لرې کولو او د کاري چارو د بهير د ښه والي او ګړنديتوب په خاطر خپلې نظريې، پيشنهادونه او طرحې د اطلاعاتو او فرهنګ وزارت له مشرتابه سره شريکې کړې .
د اطلاعاتو او فرهنګ وزارت سرپرست محمد طاهر زهير د دغو رييسانو د کارونو او برياليتوبونو د رپوټونو له اورېدو وروسته د هغوى د کارونو او فعاليتونو قدرداني وکړه او ويې ويل چې د اطلاعاتو او فرهنګ وزارت د ولايتي او مرکزي څانګو رييسانو او مسوولينو په ښه ډول د هېواد د فرهنګ ښه استازيتوب کړى دى او له هغوى څخه يې منننه وکړه.
کابل/ د وري ١٢ مه/ باختر
