پروان کې د سیاحتي شرکتونو له مسؤلينو سره د همږغۍ ناسته وشوه
د پروان ولایت په اطلاعاتو او کلتور ریاست کې د سیاحتي شرکتونو له مسؤلینو او استازو سره د همږغۍ ناسته وشوه.
د پروان د اطلاعاتو او کلتور رئیس مولوي شمس الحق صدیقي وویل: د دې ناستې موخه همږغۍ رامنځته کول، کاري اړیکې پراخول، معیاري او قانوني خدمتونه وړاندې کول دي، نوموړي د اطلاعاتو او کلتور ریاست له لوري د دغو شرکتونو د ملاتړ ډاډ ورکړ او زیاته یې کړه؛ دا ریاست د ټولو خلکو ګډ کور دی او تل د خلکو د ستونزو حل ته ژمن دی.
د اطلاعاتو او کلتور رئيس له سیاحتي او زیارتي شرکتونو وغوښتل، چې خپل یووالی وساتي او خلکو ته د رښتینو خدمتونو وړاندې کولو لپاره هلې ځلې وکړي.
له بلې خوا د سیاحتي شرکتونو یو شمېر مسؤلینو او استازو د دغې ناستې له جوړېدو مننه وکړه او د خپلو ستونزو د حل غوښتنه یې وکړه، چې د اطلاعاتو او کلتور رئیس د هغوی د ستونزو د حل کولو ډاډ ورکړ.
۱۴۴۶/۸/۱۹ ق
۱۴۰۳/۱۱/۳۰ ل
