بادغیس کې د امارتي ادارو له ویاندویانو، خبریالانو او د رسنیو له مسوولینو سره د همغږۍ غونډه وشوه
د بادغیس اطلاعاتو او فرهنګ ریاست له لوري د امارتي ادارو له ویاندویانو، خبریالانو او د رسنیو له مسوولینو سره د همغږۍ غونډه وشوه.
په دې غونډه کې د اطلاعاتو او فرهنګ رئیس د اسلامي فرهنګ په وده کې د رسنیو رول او اهمیت په اړه خبرې وکړې او ویې ویل: رسنۍ د خلکو په پوهاوي، د اسلامي افکارو په عامولو، د ناسمو افکارو د خپرېدو په مخنیوي او د اصلاحي فکرونو په پراخولو کې مهم او رغنده رول لري. نوموړي زیاته کړه، چې رسنۍ کولای شي د ټولنې په اصلاح او د عالیقدر امیرالمؤمنین (حفظهالله) د فرامینو په پلي کېدو کې اغېزمنه ونډه واخلي.
د غونډې په لړ کې د عالیقدر امیرالمؤمنین(حفظهالله) د ۳۲ ګڼې فرمان واورل شو، چې په دغه فرمان کې د جهادي، فرهنګي، ادبي او معنوي ارزښتونو پر ساتنې ټینګار شوی دی.
په بادغیس کې د خبریالانو د خوندیتوب کمېټې استازي د شته همکاریو څخه د خوښۍ څرګندولو ترڅنګ وویل: د اطلاعاتو او فرهنګ ریاست، رسنیو او د خبریالانو د خوندیتوب کمېټې ترمنځ بشپړه همغږي موجوده ده او د رسنیو خپرونې د ا.ا.ا د پالیسۍ له مخې دوام لري.
د غونډې په پای کې ګډونوالو د بېلابېلو موضوعاتو په اړه خپل نظرونه او وړاندیزونه شریک کړل او د لا زیاتو همغږیو او همکاریو پر دوام یې ټینګار وکړ.
۱۴۴۷/۱/۵ هـ ق