د الف نړیوالې مؤسسې استازو د ګڼو فرهنګي پروژو د پيل او دوام ژمنه وکړه

د اطلاعاتو او فرهنګ وزارت د فرهنګ او هنر له معین سره د الف نړیوالې مؤسسې استازو کارلوس ادواردو او الکساندر فایبیګ او د آغاخان مؤسسې د فرهنګی برخې مسؤل انجینر میوندی وکتل.
د لیدنې په پیل کې د فرهنګ او هنر معین مولوي عتیق الله عزیزي افغانستان ته د یادې مؤسسې استازو د راتګ هرکلی وکړ او د افغانستان د فرهنګي او لرغونو میراثونو د پیاوړتیا او خوندیتوب په برخه کې یې د دغې مؤسسې رول او ملاتړ مهم وباله.
ښاغلي عزیزي زیاته کړه، چې له لسیزو وروسته، په لومړي ځل داسې زمینه برابره شوې چې د افغانستان د تاریخي اثارو، لرغونو سیمو او فرهنګي میراثونو ساتنه وشي، نو له نړیوالو موسسو څخه تمه کېږي چې د سیاسي ملاحظاتو پرته د هېواد د فرهنګي میراثونو او تاریخي ابداتو په استحکام او خوندیتوب کې اغېزمن رول ولوبوي.
دغه راز د الف مؤسسې استازو په افغانستان کې ترسره شوې فرهنګي هڅې مهمې وبللې او د ګڼو فرهنګي پروژو د پيل او دوام ژمنه یې وکړه. د یادې موسسې استازو د لوګر ولایت د مس عینک سیمې د اثارو د خوندیتوب او تحکیماتي هڅو، په بامیانو کې د یو شمېر پروژو، د غور ولایت منار جام د ساتنې، د هرات د منارونو، د کابل بالاحصار او په نورو ولایتونو کې د تر کار لاندې پروژو یادونه وکړه او دا یې د پام وړ وبللې.
د الف نړیوالې مؤسسې استازو له اطلاعاتو او فرهنګ وزارت سره د لا نږدې، منظم او اغېزمن کار کولو پر اړتیا ټینګار وکړ او ویې ویل: د دواړو لورو د همغږۍ لپاره باید یو روښانه میکانیزم او چوکاټ موجود وي.
۱۴۴۷/۱۱/۲۴ هـ ق