٢٠ کلن اشغال ته د کتنې څېړنیز فرهنګي سمینار د مقالو په څرنګوالي ناسته وشوه
د اطلاعاتو او کلتور وزارت د هنر او کلتور معین مولوي عتيق الله عزيزي په مشرۍ افغانستان کې شل کلن اشغال ته د کتنې سمینار د ژر جوړېدو، د مقالو په څرنګوالي او لازمو لارو چارو د سمینار د غړو په شتون کې ناسته ترسره شوه.
د هنر او کلتور معین مولوي عتیق الله عزیزي د تاریخ پر سپینو پاڼو د افغانستان د خلکو د جهاد او سپېڅلې مبارزې لیکل اړین وبلل او زیاته یې کړه؛ د دا ډول سمینارونو له لارې غواړي یاد جهادي ارزښتونه خوندي کړي.
همدا راز ښاغلی عزیزي وویل: په یاد سمینار کې د اشغال پر وړاندې د افغانانو د سرښندنو، حماسو، د بېلابېلو اقشارو د قربانیو او مېړانو پېښې او خاطرې به د یوه مستند کتاب په شکل کې مصؤن او محفوظ کړي.
په ناسته کې د جهادي ارزښتونو د لوی ریاست رئیس مولوي ذبیح الله نوراني هم خبرې وکړې او دغه علمي سمینار یې له دې امله مهم وباله، چې د جهادي ارزښتونو د نوي رامنځته شوي ریاست دنده د تېرشل کلن اشغال د وحشتونو او د افغانانو د مېړانو راټولول دي، چې د سمینار مقالې او علمي مواد به د دوی د کارونو په پرمختګ او د معلوماتو په غني کولو کې موثر رول ادا کړي.
وروسته د سمینار غړو په خپل نوبت د مقالو په جالبیت او د لیکوالانو د انتخاب په برخه کې خپل نظرونه او مشورې وړاندې کړې.
۱۴۴۶/۵/۲۵ هـ ق
۱۴۰۳/۹/۷ هـ ل
