د اطلاعاتو او کلتور رئيس له نای کلا څخه لیدنه وکړه

د غزني ولایت د اطلاعاتو او کلتور رئيس ملا حميدالله نثار د غزني له مشهورې تاريخي نای کلا څخه لیدنه وکړه.
له نای کلا څخه د ليدنې پرمهال ملا حميدالله نثار وويل: ياده کلا چې د غزنويانو دورې مشهوره زندان و، د دې له امله چې د غرونو په منځ کې موقعيت لري، د تاريخ پوهانو له لوري پرې ډيرې څېړنې نه دي شوي.
د نوموړي په وينا نای کلا په خپل وخت کې له داسې دېوالونو برخمنه وه، چې د دښمن له لوري يې نيول ناممکن و، اوسني نيمه لوېدلي دېوالونه يې د دې ښکارندويي کوي چې څومره کلک او مضبوط جوړ شوي دي.
ښاغلي نثار زياته کړه؛ د اطلاعاتو او کلتور وزارت په پام کې لري، چې د غزني ولايت ټول تاريخي آبدات بیا ورغوي او د سيلانيانو لپاره يې د سياحت او ليدلو وړ ځايونو باندې بدل کړي.
د يادونې وړ ده، چې د تاريخي رواياتو په اساس دا کلا د غزنویانو په دوره کې د زندان څخه علاوه، د موزيم په ډول هم استفاده کېده او د وخت قيمتي سرمايې او جنګي غنيمتونه هم همدلته ساتل کېدل.

۱۴۴۶/۵/۱۰ هـ ق
۱۴۰۳/۸/۲۲ هـ ل