د جهادي ارزښتونو ساتنې لوی ریاست رئيس او مل پلاوي د ننګرهار د اطلاعاتو او کلتور له رئيس سره وکتل
چهارشنبه ( ۷ د رجب المرجب ۱۴۴۶) د اطلاعاتو او کلتور وزارت اړوند د جهادي ارزښتونو ساتنې عمومي رئيس مولوي ذبیح الله نوراني او مل پلاوي د ننګرهار د اطلاعاتو او کلتور له رئیس قاري احسان الله ساجد سره وکتل.
د دغه کتنې په پیل کې د جهادي ارزښتونو ساتنې عمومي رئیس مولوي ذبیح الله نوراني؛ د ننګرهار ولایت د تېر شل کلن اشغال پرمهال د مجاهدينو په قربانیو، سرښندنو او د جهادي آثارو په ښې ساتنې رڼا واچوله او وویل: د اطلاعاتو او کلتور وزارت په چوکاټ کې د ياد رياست رامنځته کولو موخه دا ده، چې د تېر شل کلن اشغال پرمهال د مجاهدينو د قربانیو او سرښندنو ساتنه وشي او د تاريخ په کتابونو کې ثبت شي.
همدا راز نوموړي زیاته کړه: تاسې کوښښ وکړئ چې په ولايت کې له اړوند ادارو سره په همغږۍ د تېر شل کلن جهاد ټول آثار او د شهیدانو سوانح راټول کړئ، همدارنګه د اشغالګرو آثار او ټول ارزښتونه خوندي او راتلونکي نسلونو ته ورسوئ.
په پای کې د ننګرهار د اطلاعاتو او کلتور رئیس قاري احسان الله ساجد، په ټولو چارو کې د بشپړې همکارۍ ډاډ ورکړ.
۱۴۰۳/۱۰/۱۹ه ل
۲۰۲۵/۱/۸ هـ ق
