د جوزجان د اطلاعاتو او کلتور رياست له شپږو ښوونيزو مرکزونو سره د همکارۍ هوکړه ليکونه لاسليک کړي
شنبه (۱۳ د رمضان المبارک ۱۴۴۵) د جوزجان ولايت د اطلاعاتو او کلتور رياست د ۲۰۰ اړمنو ځوانانو او د شهيدانو د کورنيو د غړو لپاره د زده کړو ترلاسه کولو په موخه د شپږو ښوونيزو مرکزونو سره د همکارۍ هوکړه ليکونه لاسليک کړي.
د جوزجان ولايت د اطلاعاتو او کلتور رئيس مولوي سيف الدين معتصم وويل: د خصوصي ښوونيزو مرکزونو سره د همکارۍ هوکړه ليکونو په ترڅ کې يې دا ځل د طلوع سعادت د لوړو زده کړو خصوصي موسسې سره د هغو ځوانانو لپاره چې د ياد رياست له لوري دوی ته استول کيږي، په فيس کې د ۱۰، ۳۰ او ۵۰ سلنه تخفيف هوکړه ليک لاسليک کړ.
ښاغلي معتصم د ځوانانو په ظرفيت لوړونه ټينګار وکړ او زياته يې کړه؛ د اطلاعاتو او کلتور رياست دروازې د ځوانانو پرمخ خلاصې دي، مونږ هڅه کوو، تر څو دوی ته د زده کړو ترلاسه کولو لپاره بهترين فرصتونه برابر کړو.
