په بامیانو کې د لرغون پېژندنې نړیواله ورځ ولمانځل شوه

د بامیانو ولایت په اطلاعاتو او کلتور ریاست کې د لرغون پېژندنې نړیواله ورځ ولمانځل شوه.
په دې اړه جوړه شوې غونډه کې د یاد ولایت د اطلاعاتو او کلتور رئیس صفي الله رائد، د يونما دفتر استازی جعفر رحيم، د بامیانو پوهنتون استادانو او محصلینو هم ګډون درلود.
په پیل کې ښاغلي رائد د لرغونو آثارو د ساتنې په اړه خبرې وکړې او ویې ویل: لرغوني آثار او تاريخي ځايونه تاريخي ارزښت لري او د هېواد کلتوري هويت دی.
د ښاغلي رائد په خبره، په بامیانو کې د سلګونو لرغونو آثارو تر څنګ ۸ سیمې د علمي او کلتور سازمان (یونسکو) په نوملړ کې د بیا رغونې لپاره شاملې دي. همدا رنګه په اوسني وضعیت کې د دغه ښار د ساتنې او بیارغونې لپاره جدي هڅې روانې دي.
ورپسې د پوهنتون استاد محمد ياسين شهروند په خپلو خبرو کې ټينګار وکړ چې د کلتوري ميراثونو ساتنه يوازې داطلاعاتو او کلتور رياست مسؤليت نه دى؛ بلکې د ټولو هېواد والو مسؤليت دى.

۱۴۴۵/۳/۲۹ هـ ق
۱۴۰۲/۷/۲۳ هـ ش