په بغلان ولایت کې د خبريالانو د کار په وړاندې هېڅ ډول محدوديت نشته

يادې څرګندونې د بغلان اطلاعاتو او فرهنګ رئیس ښاغلي مولوي اسدالله "مصطفی هاشمي" د رسنیو له مسئولينو، خبريالانو، د ولایت مقام او امنیې قومندانۍ وياندويانو سره په ناسته کې وکړې، همدا راز ښاغلي مصطفی هاشمي په بغلان کې د رسنيو له فعالیت څخه خوشحالي څرکنده کړه او د وزارت وېب سایټ ته يې وويل:
رسنۍ او خبريالان له کوم محدوديت پرته له ټولو دولتي ادارو څخه د ا.ا.ا اصولو سره سم راپور برابرولای او پر وخت يې خپرولای شي.
په یاده ناسته کې د ولایت مقام وياند ملاعلم مجيدي او د بغلان پوليسو وياند مولوي شیراحمد برهاني په بغلان کې د خبريالانو د امنيت له تامين څخه اطمینان ورکړ، او ويې ويل: هېڅ کس ته اجازه نه ورکوو چې خبریالان وځوروي او د اطلاع رسولو بهير له بحران سره مخ کړي.
په دغې ناسته کې د خبريالانو د خونديتوب کمېټې استازي عبدالواحد وحدت او يوشمېر خبريالانو د دولتي ادارو او خبريالانو ترمنځ په لا زياتې همغږۍ ټينګار وکړ او زیاته یې کړه، چې د کره او بې پرې اطلاع رسونې په خاطر له هېڅ ډول کوشش او هڅې درېغ نه کوي.
هیره دي نه وي، چې مدا اوس د غږیزو، انځوريزو او چاپي رسنيو په شمول له لسو زياتې رسنۍ په بغلان کې فعالیت کوي.
کابل، وېبسايټ، د سلواغې ۹مه