د لوحو او اعلاناتي تابلوګانو د اصلاح کمېسيون مشورتي غونډه وشوه
د اطلاعاتو او فرهنګ وزارت د خپرونو چارو معينیت اړوند د لوحو او اعلاناتي تابلوګانو د اصلاح کمېسيون مشورتي غونډه د کابل ښاروالۍ د فرهنګي او ټولنیزو چارو د رئیس ملا عبدالنافع تقي په مشرۍ د یاد کمېسیون د غړو په شتون کې د کابل ښاروالۍ په فرهنګي ریاست کې وشوه.
د غونډې په پیل کې، د کمېسیون منشي د یاد کمېسیون د ساحوي فعالیتونو راپور د کمېسیون له غړو سره شریک کړ.
په دې غونډه کې د لوحو د جوازونو د ترلاسه کولو لپاره دوه غوښتنلیکونه، په لوحو کې د بهرنیو ژبو د کلمو د کارولو له امله رد شول او د دواړو ځایونو له مالکانو وغوښتل شول، چې د خپلو سوداګریزو فعالیتونو او کسب اړوند لوحې او اعلانونه د هېواد په ملي ژبو جوړ کړي.
همدارنګه، د کمېسیون له دارالانشاء څخه وغوښتل شول، چې د خپل سرو دېوال لیکنو او نښلول شویو اعلانونو په اړه د کمېسیون د کړنلارې له معیارونو سره سم یوه مسوده چمتو کړي، ځکه دغه ډول کړنې د شخصي ملکیتونو د مالکانو د شکایتونو او د ښار د ککړتیا لامل شوې دي. یاده مسوده به له اړوندو دولتي او خصوصي ادارو سره هم شریکه شي.
همدارنګه، د کابل ښار د نهمې ناحیې اړوند د مکرویانو نوي بازار د کمېسیون راتلونکی ساحوي پروګرام د ترسره کېدو لپاره وټاکل شو.
۱۴۴۸/۶/۱ ه ق
