د لوحو او تبلیغاتي تابلوګانو د اصلاح کمېسيون نوبتي غونډه وشوه
سه شنبه (۲۶ د محرم الحرام ۱۴۴۷) د اطلاعاتو او کلتور وزارت د خپرونو چارو د معين ښاغلي مهاجر فراهي په مشرۍ د لوحو او تبلیغاتي تابلوګانو د اصلاح کمېسيون نوبتي غونډه په یاد معينيت کې ترسره شوه.
د غونډې په پيل کې د کمېسيون رئيس ښاغلي مهاجر فراهي د کمېسيون په اهميت خبرې وکړې او د ياد کمېسيون چارې يې د افغاني فرهنګ د پراختیا او ودې لپاره ارزښتناکې وبللې.
ورپسې د کمېسيون د منشي له لوري ۲۰۰ کليمو او اصطلاحاتو ته د جوړو شويو بديلو کليمو په اړه بحث وشو او د کميسيون غړو يې د تطبیق کولو په موخه نظريات شريک کړل.
همدا راز د غونډې په ترڅ کې د یاد کمېسيون غړو په کارونو کې د پرمختګ او نوښت په موخه بېلابېلې مشورې شريکې کړې او په دې اړه يې خپل نظريات وړاندې کړل.
د غونډې په وروستيو کې د کمېسيون د عملي کار لپاره ساحه وټاکل شوه، تر څو ټاکل شوې کميټه د یادې ساحې له لوحو او تبلیغاتي تابلوګانو څخه نظارت وکړي او له ټاکل شويو معیارونو سره يې برابرې کړي.
۱۴۰۴/۴/۳۱ هـ ل
