د هنر او فرهنګ معين له فرهنګيانو، خبريالانو او د تياتر له هنرمندانو سره ناسته وکړه
د اطلاعاتو او فرهنګ وزارت د هنر او فرهنګ معين مولوي عتيق الله عزيزي هرات ته د سفر پر مهال د ياد ولايت له فرهنګيانو، خبريالانو او د تياتر له هنرمندانو سره ناسته وکړه.
ښاغلي عزيزي وويل: هرات ته د سفر موخه د تاريخي آبداتو ليدنه، د فرهنګي وضعيت ارزونه او د هنرمندانو او فرهنګيانو د ستونزو څېړنه ده.
نوموړي د هرات تاريخي او فرهنګي مقام ته په اشارې وويل: دا ولايت د هېواد له مهمو فرهنګي مرکزونو څخه شمېرل کېږي، د اطلاعاتو او فرهنګ وزارت د دې ولايت د تاريخي آبداتو ساتنې او بيارغونې ته ژمن دی، د هرات د يو شمېر تاريخي آبداتو د بيارغونې چارې په پلان کې شاملې دي او هڅه کېږي، چې د دغو ارزښتمنو آثارو ساتنه او رغونه په معياري ډول وشي، د فرهنګي او هنري فعاليتونو د پراختيا لپاره، په ځانګړي ډول د تياتر په برخه کې، ځانګړي پروګرامونه تر لاس لاندې نيول شوي دي، په هرات کې د تياتر هنر د پياوړتيا لپاره به د دې برخې تشکيل زيات شي او هنرمندانو ته به د لا ښه فعاليت زمينه برابره شي.
د هرات د اطلاعاتو او فرهنګ رياست مسؤلينو وويل: هرات تل د هېواد له مهمو فرهنګي مرکزونو څخه پاتې شوی، د دې ولايت هنرمندانو، ليکوالانو او خبريالانو د فرهنګ او هنر په وده کې مهم رول لوبولی دی، هڅه کوو، چې د لا غوره زمينو په برابرولو سره، له فرهنګي، رسنيزو او هنري فعاليتونو ملاتړ وکړو او د وزارت په همکارۍ موجوده ستونزې حل کړو.
همدا راز هنرمندانو، خبريالانو او فرهنګيانو خپلې نظريې، وړانديزونه او ستونزې شريکې کړې او د هنرمندانو وضعيت ته د لا زياتې پاملرنې، د فرهنګي اسانتياوو رامنځته کولو، د رسنيو ملاتړ او په دې ولايت کې د هنري فعاليتونو د پراختيا غوښتونکي شول.
۱۴۴۷/۱۱/۲۷ ھـ ق
