د پروان له وړيا ښوونیز مرکز څخه سلګونه تنه ځوانان فارغ شول
د پروان ولایت د اطلاعاتو او کلتور ریاست د ځوانانو چارو آمریت د وړیا ښوونیز مرکز څخه سلګونه تنه ځوانان د کمپیوتر، ریاضي او انګلیسي د زده کړې پروګرامونو له درې میاشتنیو زده کړو څخه فارغ او د فراغت سندونه یې ترلاسه کړل.
د اطلاعاتو او کلتور رئیس مولوي شمس الحق صدیقي د دیني او عصري علومو زده کړې اهمیت او اړتیا په اړه خبرې وکړې او ویې ویل: نن عصر چې د ټکنالوژۍ دی، نو د دیني علومو تر څنګ د عصري علومو لکه: کمپيوټر او انګلیسي ژبې زده کړه د ټولنې لپاره هم مهم دي.
ښاغلي صدیقي ځوانانو ته ډاډ ورکړ چې د اطلاعاتو او کلتور ریاست د ټولو کور دی او تل د دیني، کلتوري او ښوونیز ارزښتونه ساتي او د ځوانانو په پرمختګ کې هلې ځلې کوي.
همدارنګه یو شمېر مسوولینو د دیني او عصري علومو د ارزښت په اړه خبرې وکړې او ځوانانو څخه یې وغوښتل چې د ورکړل شویو فرصتونو څخه په ښه توګه ګټه پورته کړي.
فارغ شویو ځوانانو د اطلاعاتو او کلتور ریاست څخه د دغه ډول ښوونیز پروګرامونو د جوړولو مننه وکړه او د نورو پروګرامونو د پرانیستې غوښتنه یې وکړه.
۱۴۴۶/۹/۲۶ هـ. ق
۱۴۰۴/۱/۶ هـ. ل
