کندهار کې د استاد محمد معصوم هوتک د علمي او ادبي خدمتونو په وياړ ستاينغونډه جوړه شوه
د کندهار اطلاعاتو او فرهنګ رياست د کندهار پوهنتون ژبو او ادبیاتو پوهنځي، میرویس نیکه پوهنتون او کندهار تحقیقاتي مرکز په همکارۍ د احمد شاه بابا په تاریخي کور کې د نومیالي ليکوال او څېړونکي استاد محمد معصوم هوتک د علمي او ادبي خدمتونو په ویاړ ستاينغونډه جوړه کړې وه، چې پکې علماء کرامو، مشرانو، د پوهنتونونو استادانو، لیکوالانو، سوداګرو، شاعرانو او د ادب مينه والو ګډون کړی وو.
د اطلاعاتو او فرهنګ رئيس مولوي انعام الله سمنګاني ګډونوالو ته د ښه راغلاست ویلو ترڅنګ د غونډي د موخې او ارزښت په اړه خبري وکړې او زیاته یې کړه، چې زموږ د ټولنې لیکوالان له دې امله هم د ډېرې ستاینې او درناوي وړ دي، چې د لیکوالۍ له پیله، د کتابونو تر چاپ او د خپل ادبي ژوند په ټولو پړاوونو کې له نږدې هیڅ ډول امکاناتو او وسایلو څخه برخمن نه دي پاتې شوي. استاد هوتک په ټول علمي او ادبي ژوند کې د خپل وړ استعداد او ژور علم څخه په ګټې اخيستنې سره خپلې ژبې او ټولنې ته تر ۶۰ پورې بېلا بېل آثار ليکلي او وړاندې کړي دي.
په دې علمي غونډه کې پوهندوی مطیع الله روهیال د ښاغلي استاد هوتک د ژوند، زده کړو، علمي او ادبي خدمتونو په اړه خبرې وکړې او د هغه ترسره کړې علمي هڅې یې وستایلې.
دغه راز استاد محمد معصوم هوتک د خپلي وينا پر مهال د احمد شاه بابا تاریخي کور جوړونې او په دې برخه کې د اطلاعاتو او فرهنګ ریاست پاملرنه او هڅې وستایلې او ویې وويل: د اطلاعاتو او فرهنګ ریاست خپل مسؤوليت په ښه توګه ادا کړی دی، چې د کندهار د ليکوالانو او شاعرانو تشويق او د تاريخي آبداتو رغېدنې ته يې خورا ډېر کار کړی دی.
د غونډې په پای کې د کندهار اطلاعاتو او فرهنګ ریاست له لوري استاد هوتک ته ستاینلیک، بېلابېلې ډالۍ او د اعزاز پګړۍ ور په سر شوه.
د يادونې وړ ده، چې د کندهار اطلاعاتو او فرهنګ رياست له لوري له دې وړاندې هم د یو شمېر ليکوالانو او شاعرانو خدمتونه ستايل شوي.
۱۴۴۷/۱۲/۲۴ هـ ق
