ځوانان او د ټولنیزو شبکو فعاله غړي په ټولنه کې مهم او رغنده رول لوبولی شي
د کندوز ولايت د اطلاعاتو او کلتور ریاست د عامه کتابتون په تالار کې د ځوانانو چارو آمريت لخوا د (ځوانانو د فکري وړتيا لوړونې) تر نامه لاندې سیمینار ترسره شو، یاد سمينار کې مولوي عبدالغفور شهیدزي د ولایت مقام د دفتر رئيس، د اطلاعاتو او کلتور رئيس مولوي ګل محمد الیاس، د علماوو شورا، امارتي پوهنتون او اداري اصلاحاتو ریاستونو مسؤلینو، ګڼ شمېر ځوانو مبارزینو، لیکوالانو او خبریالانو ګډون کړی وو.
د اطلاعاتو او کلتور رئیس مولوي ګل محمد الیاس ټولو مېلمنو ته د ښه راغلاست ترڅنګ وویل: له نېکه مرغه امریکایان او د هغوی متحدين په ډېرې بې شرمۍ سره د پیاوړو مجاهدینو پرمټ له هیواده وشړل شول، خو له بده مرغه دغو اشغالګرو په تېرو شلو کلونو کې د افغانستان په ځوان کهول ډېر کار کړی او فکر یې په کامله توګه اړولی و، هغه له ټولو ویښو ځوانانو غوښتنه وکړه چې د اسلامي اُمت او ځوانانو لپاره د اسلامي روحيې په ورکولو کې نه ستړې کېدونکې هلې ځلې وکړي او زياته يې کړه؛ اوس د دې وخت رارسېدلی چې موږ ټول په ځانګړي ډول ځوانان باید د خپل قلم او استعدادونو څخه په استفادې د اسلامي نظام په ساتلو کې تر بل هر وخت چټک ګامونه اوچت کړو.
د ولایت مقام د دفتر رئيس مولوي عبدالغفور شهیدزي وویل: فکري جګړه تر نظامي جګړې ډېره مهمه ده، الحمد لله د نظامي جګړې په برخه کې یرغلګرو ته ستره ماتې ورکړل شوې، خو فکري جګړه تر اوسه هم روانه ده، چې باید پر وړاندې یې ټول یو موټی شو، دا چې یو شمېر بې خبرو افغانانو په تېرو کلونو کې له یرغلګرو سره لاسونه یو کړي وو او فکري جګړه يې ورسره يوځای پرمخ وړله، له همدې کبله دغه پدیده تر اوسه پورې په میراث را پاتې، راځئ چې د دې شومې پديدې پر وړاندې په يووالي سره مبارزه وکړو او د اوسني نظام د ساتنې او هېواد د پیاوړتیا په برخه کې له مسؤلینو سره همکار پاتې شو.
۱۴۴۶/۴/۶ هـ ق
۱۴۰۳/۷/۱۸ هـ ل
